Si mi konpran bien sak mi antann par-si par-la :

Mèm si méssié Préfé la déside sispann in bonpé pèrmi konstruir akoz bann éstasion dépirasion na poin konm k’i fo an sifizans. Donkalor, bann projé lozman sosial épi lozman itèrmédièr lé an stannbay ;
Mèm si gouvèrnman i tard in bonpé pou fé sort son nouvo loi pou loutre-mèr, épi lékonomi i soufèr par raport a sa ;
Mèm si bann sosiété i apèl bayèr sosio, i tourn-tourn an plas san fé arien, é i kontant ashté lapartman bann sosiété privé la fé épi i gingn pa arvann ;
Mèm si dé-troi komine la pa réspèk z’ot parol épi la anil in bonpé prozé té i vo la pènn fé ;
Mèm si gouvèrnman té i doi modifié règléman déssi lapèl d’ofr é la pa fé ziska zordi...

I prétan dir sé la Réjion lé résponsab si lé kapab an avoir shomèr an plis, si dé-troi lantropriz i tard pa pou kapoté, si la kriz lé riskab fatig anou ankor plis.

Poitan, sé la Réjon k’i invèsti plis, ziska soisant-dé pou san son bidzé ! Le pon la rivièr Saint-Étienne sé èl, la mézon dé sivilizasion sé èl ankor, la finision la rout Tamarin, la pa èl galman ? Bann gran shantié pou aranz la rout, la Réjion mèm ! Nouvo lisé, la pa èl ? Aranz bann lisé in pé ansien, la pa èl ankor ? Dévlopman dirab é solidèr, kisa i fors la-dsi ? Lo plan déssi lénèrzi k’i ronouvèl, kisa la fé sa ? Pa èl ? La formasion bann travayèr, é tout sak èl i fé ankor ? Sak i bouz lé résponsab alor, sak i rès rakokiyé na rézon alor ? Alé dormi don !

Konm di lo kont, bann mantèr nana gro vant épi son pat kourt, i tard pa va débist azot !

Justin