Si mi tronp pa, sa in kozman pou di in mansonz i rézis pa lontan, par raport la vérité. Moin la fine di in foi : « Mantèr la pate lé kourt ! »-In provèrb z’alman si mi tronp pa. Kosa sa i vé dir ozis ? Sanm pou moin sa i vé dir li fé l’èr d’ète vré, mé konm i di : l’èr la pa la shanson. Si ou kalkil bien, si ou lé klèrvoiyan, la pa dir rann aou kont si inn pèrsone l’apré ramas mantèr avèk ou. An plis si la pèrsone na poin in bon mémoir èl mèm lé riskab amar la kord dann son kou. Pétète in pé rant zot i pans ou i pé travèrs in vi avèk in mansonz a la klé. Pétète in pé i pans mansonz va touzour pèrmète azot tir z’ot kou dann la. Shakinn son fasonn oir. Alé ! Mi lèss azot rofléshi la dsi é ni artrouv pli d’van sipétadyé.