Avèk kèr, dan la lang kréol, i fé gayar zéksprésion : nana bon kèr, gran kèr, kèr malèr, rant dë kèr, kèr d’solèy, kèr lion, ral lë kèr. Na ankor in bon pë, solman dann tout, na inn mi em pa dïtou, sé gro kèr. Bann moun gro kèr lé jalou dmoun, épï i tienbo rankïne. Si ou ajout ankor gro léspri avèk gro jabo, lë tablo lé konplé.

Dann tout séktèr la vi, nana dëmoun konmsa. Nana jiska dan la politik. Nana an parmi bann moun la droit, an parmi banna i fé apèl azot "sosialis" par érèr. Nana dë moun, inn i apèl Vergoz, l’ot i apèl Lebreton. Zot gro kèr i rann azot avèg. Zot i oi pï ousa i lé lintéré lë pèp rénioné, zot i souèt solman bann projé la région i kapot. Akoz sa ? Akoz la zalouzi l’apré ruine z’ot rézon. Ziska jordi, ala zot i di La rénion i gingnar pa fèr fas bann gran kontra. Ala, bann gro kèr la pou sèy port la boush kabri.

Zot i koné la fine règ la késtion n’finansman, solman zot i kontinyé rakont zot radotaj. Navé in sosialis, sèt-la té in nasional-sosialis té i di : mem si sé in mansonj, répèt alï, répèt ankor, l’moun va fini par kroir sé in vérité.

Justin