Mi sort lir in kozman dsi bann légime épi bann frui i vann dan La Frans dsi lo poinnvizé la doz péstisid zot i kontien. Fransh vérité moin té i atann pa sa pars d’apré sak i di soisant dis pour san rantre zot néna in tro for doz zinsèktiside . Mèm ké néna in pé d’moun dann bann rézo sosyal i parl lo danzé ké néna a manz bann frui épi bann légime. Mi pansré la vérité lé pa ankor koni zordi é dir in n’afèr konmsa sé pétète pou fé pèr d’moun…

An parti, épi an parti solman pars si i azout bann glifozate néna dodan dann tan té i ansèrv bann dézèrban Monsanto an poundiak si tèlman zordi ankor, bann moun i viv pa dan la kanpagn néna in doz glifozate dann zot kor.é la pa tout pars kèl doz zinséktisid néna dann lo i ansèrv pou aroz bann plantasyon., kisoi lo bann flèv épi bann rivyèr, kisoi lo la parti tir dan la tèr an fouyan bann pui.

Si sak mi di la pa mantèr é mi kroi la pa mantèr, lé pliské irzan pratik la permakiltir, lo laquaponie, l’agrikiltir rézoné pars sansa oplis valé, oplis nou sar kontaminé. Avèk kèl rézilta ? si i ékout bann éspésyalis manipilé par bann lobbi, na poin la prèv ké sa lé danzéré. A bon ! Sa lé bon pou nou alor, nout kor i yèm la salté konmsa don ?

La mi parl La frans mé isi La Rényon, I di lagrikiltir bio i avans in pé . idi l’aquaponie i avans galman, lagrikiltir rézoné lé pli avansé. Mé l’èrla in pé i s’anplègn lo pri d’rovien é sa i mète amoin atèr ; alor si i ansèrv moins l’angré é mèm pa ditou, si i ansèrv pa bann dézèrban, si i sava pa loin pou rode nout frui épi nout légime, l’èrla sa i rovien pli shèr. Sa i koup amoin in n’afèr konmsa pars i dovré z’ète lo kontrèr. Transform amoin an ponp vélo si zot i vé, mé sé in n’afèr mi kroi san pour san-mi pans plito sé konfoonn po d’shanm avèk pla kouvèr, makaroni pou la bouji.