Sa in kozman mi koné dopi bèlaz é botan mé ozis mi domann amoin si i fo pran sa sans prop sansa sans figiré, si i fo pran ali promyé dogré sansa dézyèm dogré. Moin la poz kol-la plizyèr kamarad mé bann kamarad-la la pa gingn done amoin pou konprann kosa sa i vé dir. Pé sfèr sé in sinp kroiyans demoun é i rèss pou prouvé si lé vré sansa si la pa vré. Mi ansouvien sak in kamarad la rakont amoin kan li la fé son rantré : son lémé l’avé tir manzé pou li é l’avé mète dsi son zasyète in bèl bout volaye é l’èrla son bopèr a prétann la di son lémé : « Done ali plito lo zo konmsa zot va fé zoli zanfan ansanm ! ». Mon kamarad la vni rouz konm in tomate é mi pans zordi ankor li néna konm in dan par raport son bopèr . Alé ! Mi kite azot rofléshi la dsi é ni artrouv pli d’van. Sipétadyé.