Matante Zélida la ékrir Justin :
Mon shèr nové, mi antan in pé bann politikèr l’apré bate la lang déssi la késtionn’ri. In pé i di konmsa, i tard pa nou nora pi do ri pou manzé, nora pi d’luil pou mète dann kari, parl pi la viann ! Lé riskab rès la ké kouiiik pou nou akoz lé z’ot moun étranj nora fine manz bann bon morso. Kozé lé bon, mé sa la pa pou nou. La Frans i fé nout soin, la pa bézoin ni kass nout tète. An tou lé ka, mi lèss la mèr bate. Konm di kréol : « Lang demoun sé lam la mèr ! ».

Justin la fé pou répons :
Matante, kèl koté ou i viv don ? Ou lé dann in bul ? Ou i ékout kant mèm in pé la radio. Ou i koné koméla le mond lé shanboulé. Déssèrtin gran péi pov l’apré vnir rish, nana bann péi rish i afayi. Alor mi sar pa di « baton i shanj de bout », mé lé konmsi. Bann zindien, bann brézilien, bann shinoi, i di zot na poin d’ri pou vann akoz i fo z’ot pèp i manz in kou vant plin. Kissa i pé arprosh azot sa ? Alor, lé riskab na pi pou toulmoun..

Alor, assé rakont bann romans i pass pi ! Assé tourn a ou, ou-mèm an bourik don ! I fo ni fé travay nout tète pou oir kèl parad nou néna. Matante, si i fo nou va manz patate, nou va manzé, mé papate avèk la po ? Sa non... Arète roul a nou don !

Justin