Konm tou lé z’an, Sintandré i sava fète lo Dipavali. Sa in fète pou in bonpé dmoun : domoun landroi mèm, domoun i sort dann d’ot kartié, bann touris galman. La fète la limièr, sa in gayar zafèr, sof ké lo mèr Sintandré lé plito in aportèr d’fénoir k’in aportèr d’limièr. I sifi agard la komine dan kèl éta i lé : la pa zoli, zot i pé kroir.

Ala k’so foi issi, li kol avèk la limièr la défans lanvironman. Mé kissa i pé dir amoin kansa lo mèr Virapoullé la fé in bon n’afèr pou défann lanvironman. Mi souvien solman napoin lontan bann paran z’élèv té apré plégné akoz navé lo ra, shov-souri, kankréla épi d’ot kalité zoli bébète dann bann lékol. Na bien in sant kominal, mé dan kèl éta, mondié ségnèr ! Na poin lontan, lo mèr té i vé fé mète in linsinératèr dann son komine, zis koté la shapèl Bois Rouge. Sa domoun la niabou kalé.

Zordi, li vé pa lo tram-trin, li préfèr bann loto, bann kar i kontinié fane bann gaz-a-éfé d’sèr dann lèr. Na in nouvo lékol, mé li lé pa HQE. Moin la pa antann dir Sintandré téi vé mète anlèr lo dévlopman dirab... In boug lé an rotar, li bour l’fèr pou li pas dovan lé z’ot : ditou, mèm manz manzé kui, li iema pa bou.

Justin