Matante Zélida la ékrir Justin :
Mon shèr nové, mon spès salté,
Mi konpran pa zot, moin… kan zot i di nout gouvèrnman la Droite i dovré pa frékante bann rish konmsa. Akoz ? Bann rish la pa dmoun konm lé z’ot ? Banna na poin korn kant mèm ! Kissa, d’apré zot, banna i doi frékanté ? Bann békèr d’klé, bann fin-yan, sansa bann moun na zot po d’fès dan la min ? O toi, sa lé normal sa, sa sé la vi k’i vé. Sa i vé pa dir i pran pa konsidérasyon inn-a-l’ote. Sa i vé pa dir ou lé pa sharitab. Sa i vé pa dir ou i pans solman oute posh é pa sète oute kamarade. Épi, m’a dir aou franshman : « Sak i frékant lo shien i gingn lo piss ! ». Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr…
Sak mi ème avèk ou sé out sans légalité èk la fratèrnité. Alor pour vou, lé normal bann politik la Droite i antour azot èk demoun rish. Pou ou, lé normal zot i pass vakans konm bann rishar, avèk l’amizman ki koute sé foute pa konbyin… si tèlman ké nou, pti kolon, ni ariv mèm pa dann nout rèv majine in n’afèr konmsa. Mé an plis, sa i apèl donan-donan. Si in rish i frékante in politik, la pa pou la po d’patate, mé pou grossi ankor plis son pla. A par k’sa, lintéré zénéral pou banna sé d’la blag, sé d’la krak, zot i sousyé an promyé zot lintéré. Fransh vérité, si ou i mélanj lintéré zénéral èk out lintéré, ou lé déza an danjé. Sé pou sa mi di, konm bann vyé moun : « Mardi gra, shakinn son bann ! ».

Justin