Zot i koné mardi gra ? Zot i koné sa i tonm par-la moi d’févriyé ou sinonsa moi d’mars. Inn dé dat konmsa an pasan : l’ané dèrnyèr la tonm lo 4 mars, sète ané la tonm lo 17 févriyé, l’ané k’i vien sar lo 9 févriyé...

Sé lo dèrnyé zour gra k’i amenn ziska lo mèrkrédi dé sann é sa sé lo komansman karème. Sans prop : konm sé in zour pou fé la fète, pou défoulé in pé tout kalité manyèr, demoun té i préfèr ète an parmi lo moun zot i koné. Sans figiré : sa i vé dir i mélanj pa èk n’inport ki, i mélanj pa torshon avèk sèrvyète. Sèrvyèt sé sak i koz, torshon sé lé z ‘ot é vèrsi vèrsa. Donk sa sé in manyèr pou shoizi son moun épi élimine lé z’ot. Lé konmsa : tout lé z’om lé frèr, mé plizoumoins.

Kosa zot i anpans zot ? arien ! bon, bin fé travay zot koko, fé bouy z’ot matyèr griz zot va oir ké rant-rant ni pé z’ète tazantan dakor rantre nou.