Mardi gra sé in zour d’fète. Moin la antann dir, mardi gra i vien zis avan karème. Avan la péryod pou manz mèg i ariv, sé lo dèrnyé zour bann krétien i pé pèrmète azot bien manzé. Mi vann konm moin l’ashté pars mi koné pa tro ozis ! La késtyon sé lo shakinn son bann : sa i vé dir shakinn i fé la fèt son koté avèk son bann.

Si i tienbo kont de sa, sa i vé dir demoun lé pa si akéyan ké sa, sof pou z’ot group famiy, kamarad, z’ami. Bann moun étranj alor ? Bin sé konm k’i diré i lès azot in pé par koté. Antansyon sé lo provèrb k’i di sa, é pétète lé pa konmsa san-pour-san. Par kont sak mi koné bann malbar lé pli akéyan kan zot i fé in sanblani sansa in sèrvis : i rofiz pa pèrsone !

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! zot va oir ké rant-rant, ni pé z’ète, tazantan, dakor rantre nou.