Mézami mwin lé sir zot i koné margoz lé amèr é la plipar d’tan bande marmaye i yèm pa tro léguime-la. Bande z’ansien oui pars lamèrtime i dékouraz pa zot, é konm i di, i aguize in pé zot lapéti.

Lo grin lé dou ? Sa mi koné pa pars laz mwin néna mwin la zamé fé léspèryans-la si tèlman mwin la pèr trouv dann mon boush in gou d’fyèl so kou issi. Alon di lé vré ziska prèv kontrèr.

Antouléka si ni oi kozman-la konm in provèb ni pé fé lo raproshman avèk : « Dan tou mal néna in bien é dann toute bien néna in mal. » La vi èl mèm lé konmsa ni toute blan, ni toute noir, avèk inn-dé poin bien blan é d’ote poin bien noir. Avèk son gayar, mé avèk ossi son koté mol. Normal sa lé konmsa dopi noute bande zansète la okip la tèr.

Alé ! mi kite azot rofléshi la dsu é ni rotrouv plu d’van. Sipétadyé.

Nb — i di ossi la rassine lé plate, mé sète-la mi koné pa.

Justin