Sak mi vé rakonte azot sé listoir Mario. Mario lété zésklav. Mèm li lété jenn li lété zésklav é li l’avé la shanss an avoir in mète lété zantiy, vèye pa koman. Téi trète pa li an zésklav pou vréman mé konm in pti garson d’kour é sirésèrtin sa vi lété plito bèl sof k’in zour lo mète la tonm malade é la maladi la transporte ali l’ote koté la vi, pli vite pou fé ké pou di.

Dsi son li d’mortalité, lo mète la fé kriye Lo pti marmaye é la done ali in pti vyèrz an boi débène é la fé promète ali garde pti vyèrz-la toultan avèk li konm in protékssion kom de koi l’avé poin arien pou ariv ali si li téi mète ali dsou son protékssion lo pti vyèz noir. Aprésa, lo mète la fèrm lo zyé é li la parti konm mwin la di lote koté la vi.

Mé wala la vi i rézèrv shakinn dé sirpriz, défoi sak lé bon, défoi sak lété pa bon é inn foi lo mète lété fine antéré, toute lo bien lété parpiyé, lo bann zésklav galman la trouv azot parpiyé. Pou sa par Mario la artrouv ali zésklav in mète lété lo pli mové ké l’avé dann kartyé Sinte-Mari... Pinission, lo kou, travaye dir wala son déstin si tèlman in soir li la désside alé maron é kan lo zour la lévé lo nouvo mète la roganiz bann batu pou artrouv Mario…

Mario lété introuvab é lo bann zom de min lo mète la rode ali in bon boute tan san trouv ali. Lo tan la passé é lo pti marmaye la roganiz son vi konm bann maron téi fé avèk son protékssion lo pti vyèrz an boi noir mwin la an parl azot é toultan, tou lé matin é tou lé soir li téi di son priyèr é li domann son vyèrz roganiz pou li in pti vi zoli.

Mé in zour li l’alime dofé, é lé zom lo méshan mètr la ropèr la fimé é la di : sirman in zésklav la parti maron, i fo ni souke ali, in bon prime nou va gagné. Kan Mario la antann lo shien apré aboiyé li la konpri toute suite sak téi éspass. L’èr-la li la rante dann son grote avèk in bonpé bouguinvil téi pouss, téi pouss, téi pouss mèm é kan la troupe l’arivé inpossib pou la troupe rantré… Inpossib trape lo Mario. La vyèrz téi vèye dsi li.

A bon antandèr salu !

Justin