Souvan dé foi, i di bann rénioné i fé pa valoir “la ras” : zot lé timid, zot lé anndan. zot na poin konfians dan zot. Akoz sa don ? Sré t’i k’listoir La Rénion dépi lésklavaz, an passan par langazism, lo kolonialis épi zordi in libèrté an mal kadik*, i pèz anou tro for atèr konmsa ? Ni koné pi kosa nou lé kab fé, nou na pi lamour pou nou-mèm. Konbien bon-bon l’okazion, nou la manké èk nout konplèks « pa kapab lé mor san éséyé ».
Solman, tazantan, nana in pé i kart la zèl, i drés lo rin, i pran kouraz épi i fé valoir. Somèn passé, in lékip footbal bann ti-marmay la parti zoué dann in gran tournoi, in tournoi mondial. Zot la kroiz sanm bann zènn, i sort dann tout kalité péi nana zabitan par dizènn million, ousa i tap dann balon, près kan i sort dann vant lo momon. Nout lékip l’ariv an demi-final. In foi mèm, l’ariv promyé : Nigéria zot la bat an final !
Épi nna tout lé z’ot. Mi gingn ar pa di dé in mo pou zot zordi. M’a di solman zot i mérit èt dann liv d’or bann zanfan La Rénion, sak la mèt lo péi an l’èr.
Marmay bravo ! Réspé dé zo ! Pou zot, mi tir mon shapo !

*mal kadik : crise d’épilepsie.

Justin