Médame, zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami koméla sétaki i amontr lé zot, sétaki i fé la losson, mèm sak i koné pa tro pou li, li panss li pé amontré. Lo kolonyal i panss lo péi li atéri téi égziss pa avan li. Konbien foi mwin la antande déssèrtin apré amontr zafèr zot mèm i koné pa fé, sansa dan lé zapopré- konbien de moune la rakonte in bataye si zot la pa partissipé.

Parèye kan in jenn i tonb avèk in gramoune : li panss li pé amontr l’ote in bonpé zafèr alé oir li lé pa dann pagn mé prèské. Aprésa étone pa si in pé i oi zot konm lékspèr an rogaye sossis, rogaye sounouk, osinonsa dann d’ote manzé nout péi... Mwin sa i fé pa mwin arien sof si i vé komande amwin.

Mi sorte lir in provèrb téi di konmsa : in jenn-jan doboute i oi moinss k’in gramoune assiz.Lé vré, lé pa vré, mi koné pa mé mi panss sa i vo la roflékssyon.Konm pa !

Alé ! Mi kite azot kalkilé é ni artrouv pli d’van. Sipétadyé.