Mésyé Holland la vni La Rényon moi d’aout l’ané dernier : li la promète bann planter kann li sa trouv in solisyon. Dé troi minis l’ariv apré li épi zot la di i sar trouv la solisyon. Lo fèr lé o fé é kan lo prézidan i promète in n’afèr, li tienbo. Ay ! Ay ! Ay ! Mon dyé ségnèr ! Dizon l’afèr lé fète, dizon karot lé kui ! Sof si tout kréol i donn la min.

Pandan éstan-la, gouvèrnman la pa trouv in minit, konm moin la di, pou fé son démarsh avèk l’érop. Sa i voudré dir lo sor nout kann, lo sor plis troi mil plantèr i intérès pa li. Mi pans ké non !? Dayèr minis l’outromèr i tard pa arivé. Mi souète èl i amenn in bon nouvèl pou nou.

Mé i paré, èl i vien arienk pou la kriz rokin. El nana dann son sou-min tout bann mézir k’i fo pou trouv in solisyon pou so kriz la. Alon atann, nou va oir, mé si lé osi rapid ké pou règ la késtyonn kann, ébin nou la pankor ariv la gar… Mé domoun i komans fatigé. Tout demoun La Rényon i komans fatigé. Zot na asé k’i pas la pintir dsi zot.

Alor madam la minis si ou na poin solisyon pou la késtyonn rokin, si ou na poin la solisyon pou nout kann, si ou i vien arienk pou ramas mantèr évit fé pran anou, ankor in kou, po d’shanm pou pla kouvèr, makaroni pou la bouji. Marmite i bouy, momandoné li vèrs dann fé. Obli pa !