Ayo momon ! Ayo papa ! Agard in pé, si zot i gingn, la télé lil Maurice. Zot va oir konm moin, kan bann zournalis i fé koz in moun inportan pou lékonomi, la kiltir, lo sosyal, la sékirité, sé bann mauricien zot i intèrviouv.

Sa i vien dann mon tète akoz moin la tandi, napoin lontan, dé troi pèrsone instruiyé, i fé lo stil, té apré rode pou kossa bann Rénioné i okip pa bann post an lèr dann l’admnistrasion... Alors, zot lété apré invant tout sort kalité rézon pou ésplik pou kosa nou na lo droi alé in sèrtin hautèr mé pa plis.

Pou moin, nana in rézon : nou la pankor fé nout révolisyon kiltirèl antikolonial : nou lé ankor kolonizé dann nout tète. Épi bann gro vaza, sak i sort déor i pans zot lé ankor dominèr, kolonizatèr.
Té konm sa tou tan dann bann koloni... La pa bézoin invant bann rézon i tienbo pa dbout...

Alors nou sré pli fay nout bann kouzin séséloi, mauricien ? Nou sré pli fay nout bann frèr noir l’Afrik di Sid ? Nou sré pli fay nout bann frèr zarab ? Ditou, batis ! Nou lé ankor anklavé sé tou !
Mi ansouvien in komik fransé té i di dann in éspéktak pou gaskone in pé bann dominèr : « Marok la-ba, mèm lo roi lé zarab. »*

*Guy Bedos

Justin