Fitintan kan bann travayèr téi ranporte in gran viktoir sossyal néna d’moune té pa kontan, néna demoune lété kontan, épi l’avé sète lé in pé trakassé d’oir in viktoir popilèr dévoiyé, konm pri an otaz par l’ofisssyalité. Mwin pèrsonèlman mi di, dann mon kèr, néna touzour in boute shomin pou fèr an maronaz… san lo bann kode ofissyèl La Répiblik i pass son tan a mète dsi noute parkour pou kass ali.

Mi rapèl kan la fé lo vin déssanm shomé fèryé, nou la romarke fète-la téi dovien in fète komèrssyal mèm si té galman in fète popilèr alor mwin la bien rogrète lo koté maronaz l’avé fine passé konm in linz kan i pass… Momandoné la di i sava done bann lofiss la lang in koté ofissyèl, bien guindé é tou é tou avèk in lankadroman an fonksyonèr mé shapoté par bann gran-gran fonksyonèr lé pa dakor vréman avèk noute rényonèzté.

Mwin la panss dann mon kèr, provi k’i éfass pa lo koté maronaz pars maronaz sa la fé avanss anou in bonpé késtyon d’la lang kréol La Rényon. Mi di maronaz mé in pé noré di lo koté militan é mi yèm bien so mo-la galman. In souvnir d’militan, pou amontr azot kan i kapitil dovan lofissyalité, néna in risk :

Mi rapèl l’ané 1981 Mitterrand i dovien prézidan La Répiblik avèk in bon kantité l’avansman sossyal, in pé la panss dann zot kèr i fo ni arète avèk lo maronaz épi ni rante dann in lofissyalité popilèr é momandoné mi panss bonpé la rogrété kékshoz konmsa sirtou ké an parmi bann z’om de pouvoir néna sak, dann zot projé, l’avé prévi d’kass lo rin lo parti kominis. Poitan Paul téi di linyon sé la lite é la lite i kontinyé mèm si linyon i fonkssione.

Mi panss nou va rogrète lo tan an politik lo maronaz téi vanj konte lofissyalté pou pèrmète anou déssèrtin bon kalitatif an avan olèrk inn sèrtène konplissité — sa i apèl konpromission — fé pou aféblir noute rényonèzté

A bon antandèr salu !

Justin