Oté !

Moin t’apré dir a zot, moin té sar la fèt la Salèt a pié.

Normal, nou lavé poin vélo, moto, loto ; navé zis in sarèt bèf.

Par égzanp, mon papa té rakont a moin, té avan la gèr, kan i ariv la koup kann, Tampon na pi travay, i fo alé Sin-Bénwa. I komans marsé dimans soir, ariv 32èm km, Plèn dé Kaf, i fé fré, i alim in fé, kan i bril par dovan, i zèl par déryèr ; dan la nuit mèm, zot i arpran la rout par Plèn dé Palmis, i ariv la Konfians 5 èr d’matin, i boi in kafé la boutik sinoi, i sar rod kann pou koupé, 15 zour apré i arovyin.

Sinon, dépi Tampon, li port son panyé d’pin si son tèt pou vann, pas par Troi-Mar, désann dann fon Dasy, travèrs Bra-d’la-Plèn, armont koté Dimitil, Largamas ; kan panié lé vid, i artourn.

Pièrfon, ta pré fé la rout, kit an o 4èr d’matin, alé kas makadam an ba bordmèr, mèt par ta, lo soir armont out kaz ; dan la nuit sèrs do lo 14èm km èk fèrblan si out tèt ; mi parl pa do boi pou aport pou fé kui manzé, kan lé pa paké d’zèrb pou z’animo ; sa i fé konbyinn km par zour ?

Moin mèm, tou lé z’an, la Rivièr i fé in fèt patronal promié dimans oktob. Ek mon gran frèr, nou d’sann par Mahavèl, Boi-d’Oliv, la Dig, pon Antrédé, nou travèrs la rivyèr Waki, nou sar amizé, lo soir nou armont…

Nou lavé in tant Sin-Lui, koté son kaz lavé in ray, ti vagon té i aport kann depi Boidnèf Koko ziska lizine lo Gol, nou té fé sa in zourné alé rotour ; in foi, nou la romont in vas, nout l’éritaz kan tant Nini lé mor ; tousala a pié.

Domoun i bouz konm sa oté, obézité pa koné, sa i mars a pié, é lé bon pou la santé ! 

Justin