Mi souvien, dann tan moin lété marmaye, nou téi kour partou dann karo kann pou alé rod gouyav, zanblon, sansa pou ramas in brède avèk in poigné piman. Mé lo propriyétèr té malis : téi jène pa li pou mète sou la paye kann pyèz rakète gran zépine.

Téi jène pa non pli sak l’avé son bézoin pou fé : an plin dann santyé li té i larg son n’afèr. Aprésa nou té riskab marsh dédan sak-rantre nou - nou téi apèl vèr boutèy. Sirtou si ni rogard an-l’èr, é pa an-ba, pa lo koté ké ni pé fèr mal anou.

Nout provèrb dann tousa la ? Sé pou dir nana z’obstak partou é si ni port pa antansyon ébin ni bite ansanm é i ariv anou dé movèz shoz. Kèl z’obstak ? Z’obstak la vi an promyé. A pli d’van tou l’moun.