Avan lèr lé pa lèr, apré l’èr lé pi lèr, bann sindika i di sé zordi ki fo bour d’fé pou vréman sou la marmit konm ri, konm mayi. Sinonsa sar tro tar. Avan sa lavé déza la grèv mé sad zordi sanm pou mwin i tonm a pik vik la sominn proshinn lo 3 mé bann dépité i sa argard lo tèks d’si la lwa El-Konmri sépousa i fo bour d’fé an kantité zisko 3 mé é an plis, konm, rant rant néna lo promié mé sépousa ki fo pa largué.

La lwa konm lé prézanté zordi na pwin pérsonn i vé, ni bann sindika, ankor mwin bann travayèr é bann patron i vé pa antann parlé, sof lo gouvérman lé antété èk sa. Donkalor bann salaryé, bann zétidian, bann liséin lé mobolizé ankor zordi minn si gouvérman i manèv par déryèr, pou rod pou kass la grèv èk inn ti graton pou bann sindika zétidian, banna i kontinié domann lo rotré lo tèks.

Konm èksa lo gouvérman èk lo prézidan lé mayé, dopi dé zour inn dé minis i vé sov lo solda hollande, rèinion par d’si réinion pou vant lo bilan i di, bondikont pou vann la marshandiz. Pwata dopi lontan gramoun i di “kan in moun lé randi fé réklam pou vann in nafèr i vé dir li na difikilté pou vann i vé dir lo nafèr lé pi vandab“. Néna i di osi : Marshandiz vanté par ouminn na pi d’valèr !