La fin d’lané konm sa, sé lo moman parétil donn kado. Sa i éspass plito zour noèl, ou inn ti pé avan. Donkalor, landomin noèl shakinn i vant son kado, sak li la ginyé, kiswa èk ti-noèl, kiswa in ti kado lantropriz, ou zis inn ti pansé kamarad osi. Boudikont sa i éspass plito dan la famy, dan nout lantouraz prosh, koté nou la minm, si mi pé di, préskan privé. Sèt ané, kèl shans pou nou ? Shakinn dantronou nou la gingn inn ti kado èk lo gouvérman osi (pou in fwa i gingn in zafèr èk zot). Pou alé trapé i sifi alé si lo nèt, ankor i donn pa nout tout, i donn ryink sak néna internèt é la ou gingn, tansyon a zot « In-kit-ropa-famy »

Tronp pa zot, zot la pa gingn in ropa pou la famy, nonva, mi rodi byin« In kit-ropa-fami ». Sé koué so mérdié la ? An gro i donn a nou lo plan pou alé vant la politik lo gouvérman i mèt an plass dopi 2012. Konm ni vant nout kado apré noèl, i domann a nou alé vant la politik gouvérman. Si néna késtyon i ariv si la tab, rant lo rougay graton é lo kary kamaron apré la sosis frit, i fo ni gingn réponn sinonsa ni pèrd o bingo. Dapré mwin avann zoué nou la finn pèrd, vik na pwin ryin pou vann. Dé zan apré, ala ousa ni lé, ala ousa nou lé randi. Prinsipal : Pou lo shomaz, kosa ni réponn, ni di la vérité ousinonsa nou manyé la lang do bwa konm zot ? Mé parlfèt sé dé késtyon plito pou bann déor, pa pou nou, sanm pou mwin ni kont pa nou.

Pou la kaz, konbyin i mankré, tré pé, boukou ? Tanto nou sora oblizé travay lo dimansh, lé vré pou vréman ou lé mantèr ? Domoun i krin pou zot sékirité, a zisto rézon ousinonsa i égzazèr ? Néna lostérité an frans ousinonsa lor i pandy an grap d’si moun ? Eské par ékzanp néna deplizanpli d’moun pov ? Ebin, tousala késtyon é dot ankor, banna i donn la répons dan lo bingo. Dan lo bingo, néna in késtyon la rèt a mwin : eské lé fransé i travay mwin k’lé zot ? Pou mwin sé voui, vik an frans na pi travay. Lozik non ? A mwin, tir pa pou mwin, mi vandra pa zot program vik, daborinn na pwin lo drwa travay o nwar é an pliskésa konm i di, marshandiz vanté par swa minm na pwin d’valèr.