Mézami in badinaz sé in plézantri. Kan fourcade téi di : « Li shante amwin toutsort badinaz téi rande amwin éré », ni konpran bien sa la pa in kozé sèryé, inportan mé kékshoz pou amizé sansa pou fé ri la boush.

Mé oila, i anparl galman lo maryaz é ni koné avèk sa i plézante pa si tèlman ké défoi demoune mal maryé la ral zot gongon d’mizèr, toute in vi épi i fo pa ni obliye lo maryaz sé in sakroman pou l’égliz, épi in kontra dovan méssyé lo mèr. Avèk an pliss bande gran gran mo in moune normal i konpran pa.

Alor, lé klèr i fo pa plézante èk sa pars la pa in badinaz ni in plézantri. Alé ! Mi kite azot rofléshi la dsi é ni artrouv pli d’van. Sipétadyé.

Justin