Médam, zé méssyé, la sossyété, koz èk mwin sé koz è in kouyon, mé sé o pé d’lo mir k’i oi lo masson.

Kozman-la i vé dir sinploman maryaz-la sa in n’afèr sèryé. Lé drol banna i konpar sa avèk in rougay tomate pars mi oi pa rougaye tomate konm kékshoz i pran a la lézère. Mé i fo kroir lo lésprèssyon lé konmsa antouléka i fo pran ali koma.

Néna ankor in léspréssyon bonpé d’moune i koné é sé « maryaz la pa badinaz ! ». Final de kont la pa in plézantri mé in kékshoz sèryé. Arien a oir avèk « maryaz déyèr la kizine » -i di galman konkibinaz.

Alé ! Mi kite azot rofléshi la dsi é ni artrouv pli d’van.Sipétadyé.