Matant Zélida la ékrir Justin :

Mon shèr nové, mon spèss salté, rouj-de-fon dovan l’étèrnité, mi oi zot i parl la lang pou di lo patoi kréol, la kiltir pou di lo folklor, mé m’a dir aou, fransh vérité mi profèr rézèrv lo mo « lang »pou la lang fransèz, « kultur » pou di la kultur fransèz. Pou kréol rényoné, mi di touzour « patoi » é pou la kiltir popilèr rényonèz mi di touzour « folklor » é la pa bann zéksité konm zot va fé shanj poinnvizé in bougrèss konm moin. La dsi ni pé diskite ziska pèrte dé vi san k’mi bouz d’in yota. Mé ala lo késtyon mi poz aou zordi : lang, kiltir, sa i done manzé d’moun sa ? Tok ! Pran sa pou toi !

Justin la fé pou répons :

Mon vyé matant i koz toultan la boush rouvèr, kan mi di aou in pé i oi pa pli loin lo bout zot né, mi vé anparl demoun konm ou, avèk sak néna dann zot tète konm zidé dépassé. Ala zordi wi poz in drol késtyon ! In késtyon mi pans sa lété klèr pou toulmoun dopi lontan é mi oi non-an touléka pa pou bann sèrvo ratapé konm in pé néna. Sèryèzman matant :

Nout bann zansète, dopi lo tan lésklavaz la fé in lang, in lang kréol, in bonpé l’anons son disparisyon dopi lontan-ébin li la pa disparète ditou. An kontrèr li lé pli for ké zamé, li lé pli dévlopé ké zamé, inn shans pou nou, pou nout zanfan, pou nout pti zanfan.

Avèk lo tan lang-la la ède anou dévlop in kiltir é si in zour in pé rant nou i ékri listoir nout pèp épi sète nout kiltir, mi pans nora dé shoz a dir va rann anou kontan, va rann anou fyèr : konm i di, nou lété kapab, é nou lé kapab alé pli loin pou trap nout libérasyon konm pèp.

Astèr si ni parl késtyon ou la pozé : si lé vré in lang avèk in kiltir sa i manz pa. ok ! Mé kosa i lé lo manzé kri san la manyèr pou prépar a li ? Kosa i lé lo ropa san la konvèrsasion-é la konvèrsasyon sé la lang, mi pans ! kosa i lé nout viv ansanm san nout kiltir, san nout lang san nout filozofi, san nout prinsip. Matant l’Om la pa solman in tib dizèstif… Vi pans pa sak ni réklam konm dévlopman dirab sa la pa in l’asosyasion rant lékonomik, lo sosyal, lorganizasyon lanvironeman é la kiltir avèk tout lo linflians lé z’inn i pé an avoir dsi lé zot. Tok ! Pran sa pou ou matant é mète bien out moushoir par dsi.