Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
nana in n’afèr mi konpran pa avèk bann rouj-de-fon : mi antann azot dir é pa arien k’in foi ké lo sistèm lé fine ariv dann son bout roulo. Donk ké na poin arien pou fèr an plis pou ariv trap in bon rézilta pars lo sistèm lé pa bon : bin si zot i pans sa pou vréman, akoz zot i démisyone pa an ésplikan pou koi. La droit lé pa konm zot vi k’la droit i éstime sé in bon réjime-touléka méyèr ké l’otonomi – é na dé bone shoz pou fèr. Rézilta : in pé lé pa lozik avèk zot mèm, in pé lé lojik avèk zot mèm. Dovine – dovinaye : Lokèl rant lé dé ? Lé bien fasil pou konète. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, moin lé pa dakor sanm ou. Mi pans pa konm ou, mé alor pa ditou. Pou kosa ? Pars in zéli sé in zéli mé li lé pri dann in sistèm. Ou i di inpé i pans lo sistèm lé bon, d’ot i pans li lé pa bon pou La Rényon. Mi èmré, ou i amontr amoin, kansréti an pintir, in zéli k’i pans ké lo sitèm lé bon kisoi in moun la droit, in moun la gosh sansa in n’ot kalité. Tout i koné lo sistèm lé pa fé pou fèr fas nout sityasion. Alor kosa i fo fèr ? I fo shanj fason gouvèrn lo péi. Donk shanj la gouvèrnans é anplis ké sa désid la riptir avèk la politik koméla… Tok ! Pran sa pou ou !