Mon shèr nové, mon spès salté !
Kossa mi sort antann ? Non, lé pa vré ! I prétan dir bann rouz-de-fon la désid réini azot, pou fé sak zot i apèl in kongré ! Pou kossa don ?
Sréti pa pou fé d’tor nout zantiy prézidan Sarkozy ? Sréti pa pou mèt anlèr inn-dé mové konplo kont bann bon moun ?
Épi, akoz zot i fé pa konm lé zot : in pti lasanblé pou la form issi, épi in gran kongré la-ba dann la Frans ? Pars nout salu lé dan la Frans, in poin sé tou. Alé, pran sa pou toi !

Justin la fé pou répons :
Mon vyé matant-touzour-dan-lérèr !
Moin té sir ou té i sar trouv a rodir déssi nout kongré. Poitan, lé pa normal in parti i réini ?
Lé pa normal, konm nou la fine fé souvan-défoi, ni réini pou diskit rantre nou ? Pou fé nout bilan, pou oir koman ni oi l’avnir La Rényon an parmi tout sort kanikrosh i ariv dan La Frans, Lérop, le mond...? Pou klèr in pé nout shomin, in poin sé tou.
Nou ossi, ni vé pa rès dann fénoir ! Épi, san déréspèkt la Frans, mi kroi, sé nou, bann Rényoné, lé myé kapab oir sak i fo pou nou, dann landroi ni rès.
Lé drol, matant, mé ou i koné out zantiy prézidan i koz konm sa mèm pou nout dévlopman ! Li apèl sa : lo dévlopman andojène !

Justin