Mon shèr nové, mon spèss salté, Rouz de fon dovan létèrnité,

…Sirman ou lé kontan-la, vik bann lédikassyon nassyonal la mète langaz kréol dan l’ékol, mé néna in n’afèr mi sava dir aou : fé aprann kréol out zanfan, fé aprann ali mèm é kossa v’arivé kan li sar dan la franss ?Li va koz kréol é pèrsonn va gingn konprann ali .Mèm in lorio sansa in koko d’ pain li gingn ar pa ashté é sa par la fote bann rouj de fon sak la obliye lo lang franssé sé sa nout salu pou alé dann péi déor…

Justin la fé pou réponss :

Mon vyé matant Zélida, sèr mon momon, sak lé bien dan ou sé k’wi mélanz lo vré avèk lo fo, lintélizanss avèk la kouyoniss :

Kan wi di pou alé an franss i fo konète franssé ou la bien rézon dsi poinn-vizé-la pars kan ou lé dann in péi i vo myé wi koné la lang lo péi sinploman pou viv é pou éshanj : donk an franss sé lo franssé , dann léspagn sé léspagnol, dann l’anglétèr sé la lang bann zanglé , kékshoz k’i koul de sours.

Mé kan wi di bann zanfan i konète ar pa koz franssé, ou lé dann l’érèr, ou lé dann lo fo pars kan i mète la lang kréol lékol, i tir pa lo franssé bien antandi. An plisské sa si in marmaye i aprann franssé épi kréol an mèm tan, sirésèrtin li va myé konète lo franssé épi lo kréol Donk sé in plüss pou li... Bann mètr épi bann métrèss -amontrèr, amontrèz - i koné sa dopi lontan é sé mèm in vérité d’baz pou bann amontrèr.

A bon antandèr salu !

Justin