Mon shèr nové, mon spès salté ! An tou lé ka, sak lavé di La Frans lé an difikilté déssi la késtionn l’ékonomi. Ou mèm la di sa ossi, mon fi d’gars ! Astèr mi pans zot la rès in pé kamu. Vik promié ministr la réini son l’ékip épi la di k’lo zafèr la pa si mové k’sa ! La fini prann désizion, astèr i fo lès lé shoz aranj in pé par zot mèm. Kan ou i mète manzé o fé, inn foi ou la fine règ lo dégré d’sèl, lo dégré d’luil, tout sak i fo, dofé déssou marmite, i fo pa alé ravaz lo kari konmsa, bour-bour kiyèr shak éstan anndan, bès do fé, goumante la flam étsétéra-étsétéra. Sak i fo, sé an avoir la passians. Sirtou pa alé pli vit ké la mizik !

Justin la réponn aèl :
Mon vié matant, aou la, ou lé bon pou gob zèf-o-la, ou. In bransh pouri, ou i akrosh ansanm. Pou pa noiyé. Si ou té in souri, nana lontan ou té fine ète pri dann matrap, dann pièj... Pars, kossa gouvèrnman la désidé kan li la aprann l’ékonomi la rant dan la kriz ? Li la konvok in rénion, lindi bonèr, pou pran bann mézir, pou mate in plan, pou ziguil la kriz. Sa li la di par avans !
Mé, kossa li la fé ? Zéro kalbas, la fimé granboi ! Li la di,konm dé koi, sirtou i fo gard son kalm ! Akoz, avèk lo kalm-la, i sava komision ? I gonf lo pla dmoun sa ? Mi kroi pa, moin lé sir sa i marsh pa. Moin lé sir, i gouvèrn pa lontan in péi avèk la krash, avèk la blag. Kozé lé bon, mé fèr lé méyèr !

Justin