Mon shèr nové, mon spès salté,

M’a dir aou in n’afèr : si i fé tro travay la tèt, i ariv in momandoné, èl i blok... Éstèr-la, konm té i di dmoun lontan : « ou lé bon pou rant Sin-Pol. » Mi kroi, zot bann rouj de fon, zot lé bon pou sa mèm ! Kossa mi lir ? Zot i voudré mète luil kari dann lauto é zot i kroi va marshé ! Alé, sort azot la don ! Bin dann kari va mète gazoil alor ? Akoz i mète pa luil tantan dann motèr ? Ou plito, i gingn pa fé in lopérasion pou tir kankrola dann z’ot tèt ?

Justin la fé aèl pou répons :

Mon vié matant,

Dizon ou lé pa tro loin la vérité. Luil kari, i mète déza dann rézèrvoir bann lauto k’i marsh èk gazoil. Solman, ou i koné lo pri luil la goumanté. Éstèr, lé tro shèr. Mi koné pa kossa i gingn fé avèk luil tantan, mé mi koné la-ba, Madagascar, demoun i plant Jatropha : i ramas lo grin kan lé sèk, i fé luil épi i mète dann motèr pou ranplas gazoil, tout sansa in pé... I arète pa lo progré matant !
É si mi di aou Jatropha nana La Rénion ? Si mi di aou, issi sa i apèl piyon d’Inn (pignon d’Inde), moin lé sir ou va pans moin lé bon pou la kamizol de fors. Alé oir !

Justin