Zot i koné, nou, rényoné, ni yèm bien alé bate karé l’il Maurice. Problèm pou nou la-ba, problèm transpor. La pa k’i mank transpor, mé oplis i sava oplis néna boushon dsi la rout. Sort isi dann l’anboutéyaz pou alé la-ba pou trouv l’anboutéyaz, non mèrsi ! Mé si lo tan l’anboutéyaz té i sava fini, l’èrla sa in n’ot afèr. Mé koman li va fini ? Par mirak ! Dann in domenn konmsa, mirak na poin.

Poitan oui, avèk lo tram-train l’il Maurice. La pa vréman sa pars z’ot tram-train azot v’apèl Métro-express l’il Maurice. Kosa sa ? Ankor in l’arlézyène vi k’i anparl sa dopi trantan omoins. Oui, mé so kou isi l’afèr lé pliské sèryé.

Par koman ? Dabor pars l’Ind la done parla désan sinkant milyon l’éro plis in prètman larzan pou 422 milyon l’éro. La fine fé lo plan. I koné li va travèrs bann vil na plis lo moun dann l’il Maurice : Curepipe, Vacoas, Rose-Hill, Quatre-Bornes épi la capitale Port-Louis donk va désèrv sis san mil pèrsone dsi in total in milyon trois san mil pèrsone. Nora dizuit trin épi disnèf éstasyon.

Pou lo minis Nando Boha train-la sar pa solman in projé pou libèr in pé la sirkilasyon dsi la rout mé galman li va mark in nouvèl étap dann dévlopman lo péi avèk bann nouvo moiyin pou sirkilé épi in méyèr l’irbanizasyon. Zot i rapèl nout projé tram-trin, li osi té prévi pou sa… Mi oi déza in pé apré ri dsi sète afèr-la sirtou sak i koné, solon zot, Maurice, myé ké bann morisien. Mi antan déza d’isi in pé apré di : sa v’ariv la Sin Glin-glin, sansa kan la mi-aout v’ariv an mé.

Ri azot ! Plézant azot ! Mé ri vite épi plézant vite pars moi d’séktanm i sava donn promyé kou d’piosh é a partir d’séktanm 2019 va mète an sèrvis tronson apré tronson. Alé oir isi nou l’apré rèv in fitur train dsi dé-troi pti tronson. Ankor sépa si la pa virtyèl par raport bann dépans la fine fé pou la rout dan la mèr.

Konm in l’ansien prézidan La Rissi téi di : dann désèrtin péi poul i shant mé i ponn pa, dann la rissi poul i ponn é aprésa zot i shant. Sa i arsanm in pé nou avèk nout voizine dann la péryod ni travèrs.