Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Accueil > Chroniques > Oté

Maurice, in pti péi ? Mi wa li plito konm in grande puissans pou domin.

samedi 27 mai 2023, par Justin


Mézami lo monde nou lé d’dan la proksimité, zour an zour, l’apré shanjé. Ziska zordi nou la baz dsu d’moune lé distanssé par rapor a nou é nou lété assé kontan pars pou nou –par rapor d’ote-noute sityassion lété kant mèm in privilézyé... nou étan départman franssé réjyon dan la franss, fézan parti d’l’érop an tan ké réjyon iltrapériférik nou téi oi anou anlèr.


Mé oila, konm mi di azot lo mond dan lé zalantour loséan indien i shanj zour an zour é sé lo réflékssyon mwin téi apré fé l’èr mwin té apré bate in karé Maurice é toush avèk mon doi épi mon zyé, é galman mon mazinassion, sak i pé apèl in grande puissans la mèr ...

Néna in marmaye la poz amin in késtyon. Li la domande amwin kissa lé pli gran rante La Rényon épi Maurice. Mwin la réponde La Rényon bien sir, a toulékou : nou néna 2500 km2 é Maurice néna arienk 2040 km2. Sé sak mwin té i panss ziska ké mi réaliz Maurice-la Répiblik la pa ditou in péi lilipussien, mé in grande puissans par la mèr.

Maurice : sé 2,6 million kilomète karé loséan indien ! Mi sorte lir sa é sa lé bien inpréssyonan. Wala in péi in pé toute grande puissans i vé diskite ansanb, sign zakor avèk, domande la kopérassion épi sign bande trété é sirtou aporte zot larzan épi pou pèrmète azot dévlopé... Wala k’an pliss Langlétèr l’apré négossyé avèk Maurice pou rande ali zarshipèl chagos li okipe ilégalman : in pti boute la tèr, pa granshoz, kassé an mil morso-55 zil a s’ki paré- mé la pa solman sa si i konte lo 650000 km2 loséan indien.

Alor mézami, Maurice in pti péi ? Alon tir sa dann noute tète si solman ni vé ète inpé réaklist é alon plito konsidèr ali pou son promèss d’avnir- promèss d’ète domin inn grande puissans dan noute séktèr l’oséan indien. Néna de koi rofléshi dsi noute prop déstin, zot i kroi pa ?

A bon antandèr, salu !


Un message, un commentaire ?

signaler contenu

Messages

  • Maurice= train pour les humains, voyageurs, travailleurs, touristes et compagnie. A la Réunion, on l’attend encore, de Ste Rose à St Joseph, avec aussi les marchandises, les conteneurs, les liquides, le sable, le sucre, le sel etc. Il y a trop de voitures, camions et motos qui font du boucan, des accidents, de la perte de temps dans les bouchons, la pollution qui fera encombrer les "centres d’enfouissement techniques", la mer, les ravines, faut voir ce qu’on y trouve, beurk ! Faut aller nettoyer tout ça, nos enfants seront fiers d’avoir penser à eux ! En attendant on continue à se moquer, non ? Bon WE zot tout, Arthur.


Facebook Twitter Linkedin Google plus