Mi doute pa banna la réspèk son zord : dolo dann boutèye plastik la pa sa k’i mank é mi doute pa inn-dé zinportatèr va nyabou fé zot bèr ladan ; pou lo sis-san-sinkante mil lite dolo mwin la anparl an-o la, si ni konte Mayotte laba néna par-la dë-san-sinkante mil pèrsone, sa i fé dë lite édmi par moune. Zot v’alé loin avèk sa. Dopi tan-la i paré la fèrm bann kolèz pars lo lé pa bon pou boir é dann lopital i koné pa koman i sa fé. Pou la prizon lé pli sinp vi k’la désside anvoye bann prizonyé La Rényon… Pa toute, ziss lo tro plin d’moune.

Konm i di, sirman so kou issi, i fo in dézyèm opérassion Wambushu pou konbate so linsékirité izyénik l’ariv laba. Dézyèm lopérassion Wambushu ? La pa bézoin, Gouvèrnman franssé épi lo Préfé la trouv myé : sé lo Préfé va pran la késtyonn d’lo pou li réglé. Pou mwin sa i vé dir lo Préfé i pran lo pouvoir dsi la késtyonn d’lo : fassil pou prann, dir pou largué !

Tro bone idé ! Idé shok ! Avèk la déssantralizassion néna bann zinstitission lé konpétan pou sa épi Mayotte néna son sossyété d’lo laba. Antouléka ziska zordi mwin téi kroi mé si mi lir bien sak lé marké dsi mon téléfone (alé dsi Google) l’afèr lé pa si klèr k’sa. Antouléka klèr konm dolo bann maoré lé blizé boir, apré karant-uit zané dopi bann izirpatèr la déssid détash Mayotte avèk bannzil Komor.

Tro bone idé ! Mé si shak foi i romarke laba dann Mayotte néna konm in l’odèr d’pa kapab doublé avèk in parfin la koripssion, mi doute pa ké gouvèrnman La Franss avèk son siper-Préfé an dë tan, troi mouvman nora fine dépouye bann maoré dsi la késtyonn zot konpétanss. La déssantralizassion lé riskab rotrouv ali an langouti !

A bon antandèr salu !

Justin