Néna bann mo k’i fash é Lo Prézidan k’lé abityé froiss demoune i ézite pa dir avèk bann moune li koz ansanm. Mé la vérité dann toussala ?

Sirman méssyé Macron lé pa résponssab si siklone Chido la fé toussa déga siklone an li mèm té in for siklone mé toussèl i pé pa fé toussa déga — Ziska zordi d’apré laktyalité, i koné pa oziss lo déga fé. Biensir i pé dir konbien demoune na poinn lo, konbien la poin kouran, konbien la poin télé fone. Sa i pé dir ! Mé kan in ladministrassion i ariv pa dir konbien d’moune lé mor, konbien lé bléssé dann in katastrof natirèl, si sa i apèl pa inkonpétanss, sirésèrtin, sa i rossanm bien. Mi koné pa si lé itil dir ankor in kou sak mwin la fine ékrir, ké sé pa dann loutre-mèr La Franss i anvoye son moune lo pli konpétan mé dann in kou komsa i arsanm bien.

Mwin la fine dir La pa Mr Macron lo sèl résponsab, mé toute bann ladministrassion la ranplass inn a l’ote laba dann Mayotte dopi la fin l’ané 1974-débu l’ané 1975 lé résponssab sak i vienn arivé… Lé possib, kan ou sé inn grann puissans détash in boute bannzil Komor konm la fé, san réspèk lo droi la dékolonizassion. Lé possib galman koupe sa par in déssizion birokratik san bien rogarde kossa néna pou fé réèlman dsi lo plan sékirité, dsi lo plan natirèl, dsi lo plan ékonomik.

Astèr kossa i pé fèr ? In bilan ? Mi panss ladministrassion i fé zamé lo bilan k’i fo. I vote in loi pou rokonstrui Mayotte an ékoutan bann danzéré pèrsonaz i vé dikt gouvèrnman son politik… alon apèl in sha in sha : si dann bann zour k’i vien, sak pèrsone i souète pa, i dékouv bann sharnyé avèk bann santène, mèm bann milyé lo mor dékonpozé, pou l’opinion piblik kissa sar résponsab. Mi panss pa sar bann demoune san papyé dann zot banga dégréné, mé la politik ofisyèl in péi la zamé éssèye rékonssilyé lo moune larchipèl é la zamé désside fé sak néna pou fé.

A ! Biensir avèk in for siklone konmsa demoune i pé z’ète dan la m… mé néna kant mèm in loi k’i di, i vo myé prévnir ké guérir ! I vo myé prévnir ké mèm pa gingn guérir !

A bon antandèr salu !

Justin