Mé apré tou néna la lite kant mèm

Mézami, dann zoinal yèr mwin la anparl in poinnvizé in léktèr zoinal Témoignages dsi dori : In poinnvizé drolman inportan épi galman intéréssan pars li aporte dolo dann moulin toute sak i milite pou lotonomi alimantèr.

Nout zoinal Témoiganges la fine ésplike pou kossa lotonomi-la lé possib, é lé mèm obligatoire si ni vé vive dann la sékirité alimantèr prinsipalman avèk noute bande prodiksyon nou néna é sète ni pé avoir. Mé néna in kozman li la fé, mi panss i mérite ni rofléshi in bon kou. D’apré noute léktèr lo gouvèrnman La franss sré kont nout lotonomi alimantère, pars lé possib, ni gingn lo gou lotonomi é ni vé pass dopi lotonomi alimantèr ziska l’otonomi politik.

Ni pé fé in rofléksyon : nou lé dann la réjyonalizassion. Ni pé d’mandé si la réjyonalizassion i pé pèrmète anou fé in plan pou trape lotonomi alimantère. Mi koné d’moun i panss ke oui. Pou mon par san alé rode pli loin mi diré lé possib néna déssèrtènn konpétanss i fo nou néna é la réjyonalizaaion i done pa nou pou linstan. Kèstyon : lé possib anou-ré zyonalizé – fé in vré plan dsi plizyèr zané pou trape noute lotonomi alimantèr sansa lé pa possib ?

Konéssan l’éta konm li lé, konéssan lo néokolonyalism konm li fonksyone, i étoneré pa mwin néna pyèz dsi noute shomin pou trape lotonomi alimantèr. A moinss ké ni pass par shomin léspérimantasyon é sa sé in shomin i pé z’ète rouvèr pou nou… Mi panss in pé lé riskab di, pou kossa ni rokilré dovan lobstak ? Sinploman mi oi koman l’apré kass noute lotonomi dann lénèrzi é mi di an moin mèm lo réjime ni viv dodan i vé pa oir anou ranfors a nou, é li souètré mèm afébli anou ankor pliss dsi lo poinnvizé noute fors prodiksyon.

Mé apré tou néna la lite lo pèp rényoné é si ni lite pou vréman, akoz pa lo sikssé o boute.