Biensir sa i éspass par milyon, mèm par milyar é pou mon par mi yèm pa la frode ; toute kalité la frode, kan sé la koléktivité lé volé é mèm bande partikilyé. Mé pa èm sa sé in n’afèr, é bate tanbour la dsi sé in n’ote afèr d’apré mwin. Mète dann mèm panyé sak la vol in zèf épi sak la vol in bèf, bande pti volèr épi bande gro volèr, sa sé in n’afèr mi trouv a pa just.

Laloi lé pa just konm nou kréol ni di.

Néna pti volèr i fini o flan é néna gro volèr k’i fini rish konm krézus. Mi pans pa toulmoune i mérite lo mèm trètman médyatik… Pou ashévé kan demoune i pass zot tan a vize zot famiye, sansa zot voizin, sansa ankor demoune zot i manz pa in grin d’sèl ansanm. Pou ashévé par dsi lo marshé kan sé d’moune la pa volé mé la fé in lérèr épi i taks azot de volèr.

Mézami l’ané proshène zot va oir lo jé i sava rokomanssé é konm d’abitide pti volèr, épi gro volèr va pass parèye dann péizaz médyatik. Mé néna kékshoz i pass arpa dann péizaz médyatik sé toute le moune i toush pa lé zède zot néna droi pars zot i koné pa. Mi oi dopi inn somenn la komine Sin-dni i pass kartyé ankartyé, pou signal demoune zot néna droi toush dé shoze é pi zot i toush pa.

Kissa l’otèr ladan ? Mi panss sé bande zinstitissyon zot mèm l’otèr, donk l’éta li mèm. Pars koméla i paré i gingn fé kékshoz pou signal bande frode avan klo frodèr la fine manifèst ali. Mé si i pé fèr sa pou la frode, i pouré galman fé pou le moune i koné pa zot droi… I paré lo prézidan, in moune kanifyé, la di dann son kanpagn i sava détèkt lo moune i fé pa valoir zot droi. Alor si i pé, akoz i fé pa ? Sansa la oblyé alor !

Pars sa i roprézante dé mil é dé san, dé milyon é dé milyar é pé sfèr lé riskab konstate l’éta li mèm i rotien san vèrssé sak demoune néna droi é sa lé pa bon kan ou néna pou ou la puissans piblik.

A bon ékoutèr, salu.

Justin