Témoignages - Journal fondé le 5 mai 1944
par le Dr Raymond Vergès

Accueil > Chroniques > Oté

Elizabeth 2 lé parti, mé lo tor fé bande shagossien i kontinyé

samedi 10 septembre 2022, par Justin


Mézami, dan la vi néna dé shoz wi fé épi i pé kontante aou. Néna galman dé shoz wi pé fé é lé possib k’i kontante pa ou ditou. Sa lé vré pou toute demoune kissoi bande gran pèrsonaz kissoi bande ti kolon, kissoi demoune inportan sansa demoune konm zot é konm mwin.Mwin lé sirésèrtin sa lé vré galman pou la Réne d’Anglétèr, néna inn –dé zour la sote l’ote koté d’la vi.


Mi anparl la réne Elisabeth 2 mé konm toute demoune i koné dann péi GB la Rène sansa lo Roi, i règn mé i gouvèrn pa. Alor lé difissil mète l’otèr dsu in monark si son péi la pran déssèrtènn déssizyon la malkontante in bonpé demoune é mèm si déssèrtènn déssizyon i koréspon, é néna toute karaktéristik , de krime kont l’imanité.

Zordi mi anparl Elisabeth 2 pars néna dé shoze i rèst dsu mon kèr é i konsèrn bande shagossien si maltrété par bande gran péi konm GB épi L’amérik mé i pé pa di sé La Réne l’otèr, pars la pa èl la pran lo déssizyon, épi pars èl na poin lo pouvoir pou pran déssèrtènn déssizyon i rolèv l’éta GB. La Réne i règn mé i gouvèrn pa. Mé konm mwin la di sa sé in n’afèr i rèst dsu mon kèr pars la si tèlman fé mal noute bande sèr épi frèr shagossien ziska zordi.

Solman mi antande si tèlman parl bande kalité d’kèr La Rène Elisabeth2, son lintélizans politik, son fasson pou di sak èl i pans an réspèktan son dévoir d’nétralité, ké mi domande amwin si kékpar par raporte lo pèp shagossien, La Réne la amontre kansréti inn foi k’èl té i aprésyé pa la fasson son péi la mal azi par raporte lo pèp shagossien. I paré èl l’avé shak foi k’i falé in pti manyèr pou amontr èl téi apréssyé pa d’fèr sak èl téi fé.

In légzanp : néna a popré vintan lo pèp shagossien la fé in prossé la kourone britanik pou gingn son droi rotourn dann son péi natal-Donk an promyé instanss bande shagossien la gagné, mé La Rène la rolèv l’apèl .Biensir sa lété in déssizion son gouvèrnman la pa in déssizyon èl la pran par èl mèm. Apréssa shak foi bande shagossien la porte in n’afèr dovan in tribinal zanglé, shak ffoi lo pèp shagossien la pèrde.

Alor si la sityassion lo pèp shagossien téi pé mérite in pé son konpassion-sète Elisabeth 2-, mi domande amwin kan épi kèl fasson, par kèl sign, an bazan dsi kèl stratazème,Elisabeth 2 la done a konprande lo pèp shagossien l’avé droi in pé la konsdérassion.. Mi oi pa ! Mi panss pa èl la fé kansréti in pti zèst pou bande shagossien , son bande sizé konm toute demoune i koné.

A bon ékoutèr, salu.


Un message, un commentaire ?

signaler contenu

Plan


Facebook Twitter Linkedin Google plus