Oté

Mé zami mi vé anparl azot in vote sansasyonèl dovan l’Onu

Justin / 24 mé 2019

JPEG - 43.6 ko

Mèrkrodi moin la avèye lo miting bann partizan Julie la doné dann i gran sal Sint-Sizane. Konm zot la fine lir nout zoinal témoignages Zédi, konm zot la fine lir la vérité dann nout zoinal, mi sava pa ankor pass in bèl koush pou flate ankor nout gayar miting so soir-la. Poitan moin noré bien anvi pars si mi tronp pa néna arienk la list Iann Brossard épi nout kamarad Julie i fé gayar rényon konmsa dann la kanpagn zéropéène. Alon atann pou oir si la mayonèz la bien monté é apré nou va gingn anparl de sa, ankor in kou.

Si mi di azot sa, sé pars kan moin l’ariv mon kaz, moin la bite an plin dsi zoinal parlé l’il Moris. Lo zoinalis té apré koz avèk bann shagosien-demoun ni koné bien ! L’avé galman bann grann pèrsonalité gouvèrnman morisien épi d’ot gouvèrnan ankor vi k’inn parti d’lo zoinal téi éspass dann l’Onu. Dsi sé antrofète moin la pa konprann pou vréman kosa sak lété apré éspaséé sak lété apré éspasé lété in gran nouvèl pou bann shagosien épi bann morisien, in klak dan la gèl pou gouvèrnman britanik.

Mé li mérite sa kant mèm pars li l’avé lokazyon rashète ali l’ané 2016 pou lo rotour bann shagosien li la pa fé. L’Onu la donn Thérésa May in ané pou diskite avèk Moris in bon règloman problèm la épi gou vèrnman britanik la pa aksépté. Dovan l’Onu li pouvé ankor fèr in zèss éli la pa fé. Li la parti plède dovan tribinal La Haye é li la gingn ankor in boush ta gèl . Li la parti dovan l’Ag l’Onu é l’ariv ali sak té i doi ariv ali. In klak dan la gèl sa mazésté britanik !

Lé normal kan ou i krash dsi bann gran prinsip lo droi internasyonal konmsa. Lé normal si ou i mépriz bann shagosien konm zot i mépriz ankor zordi. Lé vré lé shoz lé pa fé mé konm i di : shomin Gran-Bois sa lé long, ti pa, ti pa, n’arivé ! Pti pa pti pa bann shagosien v’arivé !