L’avé inn foi pou inn bone foi, méssyé lo foi la manze son foi èk in grinnsèl.

Donk la madame lo péïzan, la péïzane si zot i vé, la parti oir bande batèr tanbour épi la di : « Méssyé, zot i rode lo pli gan médssin lo Roiyome, ébin zot la bien tonbé. Li lé la é sé mon mari ! »

– oute mari madame, lo méssyé la di, mé mi oi pa okin plak dovan oute mézon. Oussa i lé kabiné doktère oute mari ?

Lo madame la ropran la parol épi la di : « Méssyé, fransh vérité, mon mari lé pou vréman lo pli gran médssin néna dann lo roiyome, mé oila, li vé pi fé son métyé doktèr. Alor pou li rokonète li sé lo pli gran doktère, i fo bate ali lo kou vèye pa koman si tèlman kan lo kou i fé bien mal, la li rokonète. Monte in pti pé é zot va oir in gro ta fimyé sé mon mari l’apré rotourne sa. Alé koze avèk li é mwin lé sir la fiye lo roi sar bien soigné. »

Banna la parti in pti pé pli o épi l’arète koté lo péîzan, la tire zot shapo épi la di :

« Bonzour doktère é mé salutassion ! »

Kriké ! kraké ! Kriké Méssyé ! Kraké Madame !

Lo péîzan lété étoné. An li même li la panss batère tanbour épi son Dë dalon-pars li l’avé Dë dalon avèk li – kissoi la tète lé piké, kissoi i foute de sa tète, mé li la pran son prékossion épi li la di poliman-zot i koné la politèss néna lontan sa i égziss. Donk li la di :

« Méssyé, mi konpran pa zot kozman, mwin lé pa doktère, mi grate la tère soloman. »

Lo troi boug la garde inn-a – l’ote épi la di dousman pou lo péïzan pa antande :

« Zot i rapèl sak lo madame la di, i fo ni bate son mayi. » é zot sé d’éskinte lo boug épi zot téi di : « Avoué ou lé doktère, avoué, sansa nou va kass oute rin. ». Lo boug i kriye : »aye ! aye ! ayé ! Ouye ! ouye ! ouye ! I vé tyé amwin mondyé ségnèr, i vé tya amwin.

Final do konte lo péîzan i fini par di :

« Oui mwin lé médssin, mwin sé mèm lo pli gran médssin ké néna dann lo roiyome. Assé tape awin éstère. Mi rokonète mwin lé médssin. Larg awin siouplé ! »

– Larg aou ? A non ! Nou la gran bézoin d’ou pou soign la fiye lo Roi.

– Mé si mi di azote mwin lé pa doktère, mi grate la tère soloman ! ». Li té pankor di sa banna fin sote dsi li é doné, siouplé, doné sé doné. »

Dézyèm morso lé fini – tanto nou va di lo troizyème morsso.