Kriké Méssyé ! Kraké Madam ! l’avé inn foi pou inn bone foi, méssyé lo foi la ma nz son foi èk in grinnsèl.

Donk lo soir, lo roi i di avèk lo péizan, domin mi sava di toute bande malade vien dovan mon palé éou va guéri azot. Lo péizan la di : « Mon roi sa lé pa possib : néna in takon malade dann lo roiyome, néna toute in takon maladi, é mwin-mèm pa médssin, mi oi pa koman mi sava songn toussa d’moune ».

Parol an tro, lo dé kapor l’arivé la komanss bate son mayi é pa pou plézanté siouplé. Li la mète a kriyé si tèlman on madame téi antan ali kriyé loin laba dopi son kaz. Sa téi fé rire aèl vèye pa koman. Mé vitman-vitmanlo péi zan i rokoné d’ète sak li lété pa, pou arète fé koriz ali… Astèr lo péizan i koné sak i atande ali é li prépare ali an onsékanss é kan lo zour la lévé, li la vi in foul de moune pli éklopé lé z’inn ké lé z’ote dovan palé lo roi.

Kriké ! Kraké ! Kriké Méssyé ! Kraké Madame !

Lo péizan la aparète koté lo roi. In boug la trape uin korné-in sorte d’o parlère é la di.

« Méssyé, médame, dann noute roiyome nou néna la shanss an avoir lo pli granmédssin néna dsi a tère é lo médssin ala li la é oila kossa li néna pou dir azot. »

Lo médssin kontr son gré la pran la parol épi la di : « A ! Zot i prétan zot lé malade ! Pou konète kissa lo pli malade rantre zot, mi roganize in kourss. Sak i ariv an dèrnyé sar brilé épi va transform ali an pomade pou guéri tou lé zot : dépar issi, rotour issi ! »

Dépar donné, toute la fonssé. Sak l’avé dë pyé la kour dsi son dë pyé, sak l’avé in pyé la kour dsi in pyé, in pé la roule dsi lo vante, in pé la kour kate pate. Antouléka zot la disparète lo péizan la di avèk lo Roi :

« Mon roi, mon roi, vi oi bien na poin pèrsone lé malade dann oute roiyome. Toute lé bon pou travaye, toute lé bon pou pèye zinpo. ». Lo Roi la done ali bonpé kado, mé kan li la di lèss ali rotourn son kaz lo roi la pa vouli, é kan li la di li lé pa médssin zot i koné kossa l’ariv ali.

Koman mon zistoir i fini, mi pé pa dir azote pars lo moune la rakonte amwin lo débu la pa rakonte amwin la fin. Antouléka mon zistoir la fini.

Koton mayi i koule, rosh i flote ! L’avé inn foi pou inn bone foi, méssyé lo foi la manze son foi in grinnsèl avèk.