L’avé inn foi pou inn bone foi, méssyé lo foi la manze son foi èk i in grinnsèl.

Donk l’avé inn foi, dann in landroi mi koné pa lo nom épi la plass li lé dsi la karte di monde, mi koné pa non pli kanssa la éspassé, sof ké lo péi té in roiyome avèk in roi épi son fiye in prinsèss zoli konm in matin l’èr solèye i lèv. Lo zistoir i di pa si li l’avé in madame, mé lé possib son madame té mor pars bann fame-saz dann tan-la l’avé poin pou gaté – toute fasson lo zistoir konm la pèrsone la rakonte amwin i anparl pa la fam lo roi. Alor, plito kéinvanté, mi profère rakonte azot tèlke.

Kriké Messyé ! kraké Madame !

In zour la fiye lo roi la tonbe malade. Pa malade koman, mé èl l’arète manjé toudinkou é èl téi dévire la tète kan téi prézante aèl lo méyèr kari lo méyèr kuizinyé l’avé kui éspésyalman pou èl. Koman i apèl sa oziss ? Mi koné pa bien. Mwin la antande téi di sa “anoréksik”mé mi koné pa oziss sé koi. Lo roi lété dépité afors li té i oi sa fiye, la prinsèss, apré afayir konmsa a vu d’èye..

Li la fé vni toute bande médsin kanifyé dann son palé pou domande azot pou soign son fiye, mé banna la pa gingn fé arien é la fiye lété touzour malade.. Mé in konséyé la di lo roi : « I fo fé bate tanbour partou pou fé vni d’ot médsin kanifyé si néna ankor dann lo roiyome épi an déor. »

Kriké Méssyé ! Kraké Madam !

Sé konmsa bande zom darm lo roi l’ariv koté la kaz in péizan. Péizan-la té méshan avèk son madam, parl pa koman. Dé foi li téi bate sa konm mayi san tir koton. Lo madame la konpri l’èr d’son vanzanss té arivé é dann son kèr èl la di : « Mon spèss shamo zordi wi sava gouté ou la ! »

Promyé morsso lé fini-dézyème sé pou tanto.