L’avé inn foi pou inn bone foi, méssyé lo foi la manze son foi èk in grinnsèl.

Konm lo madame l’avé di, son mari i siporte pa lo kou, é kan lo kou i fé mal, li avoué toute sak wi vé, mèm ké li lé doktère si li lé pa. Donk lo péizan i avoué li lé doktère, mèm lo pli gran médssin néna dann lo roiyome. Sito di, sito fé, lo bande bra for lo roi, lanonssèr piblik son band dalon, sé d’souké lo doktère an késtyon é amenn ali dann palé lo roi é kan li la rante la dan, li la di an li-mèm : « Lé pa normal in sistyassion konmsa, mi sava di sa lo roi é konm in roi, par natire, sa in moune intélizan la farsss v’arète la. » Mé a pène li la rouv son boush pou kozé souvnir lo kou la ramène ali a la rézon é li la pa di arien é sa téi vo la rokonéssans d’ète in gran médssin.

Kriké ! Kraké ! Kriké Méssyé ! Kraké Madame !

Donk l’amene ali dovan la fiye lo roi : in zoli pti tantine téi fo oir, mé anpliss la tristtess la maladi téi pé lire dsi son figuire. Lo péizan la bien rogarde la prinsèss é dann son kèr li la mazine : « kossa mi pé fère pou in prinsèss konmsa ? Kossa l’apré mine aèl par lintéryèr ? Maladi d’amour, dépréssyon. ? ». Lo péizan téi konpran pa épi d’in kou i la gingn konm in lidé : si li téi fé in grimass, pé s’fère èl va rir é souvan dé foi kan wi ri wi guéri. Ala li fé lo grimass, in vilin grimass konm nou téi fé étan marmaye kan lo doi, la lang, lo né tout téi maye ansanm.

In léfé té pa atandi, la prinsèss la pète a rire. Bande sèrvitère l’aporte in ropa pou èl - in gayar ropa, èl la manzé é la maladi la parti o galo… Lo roi la fé aporte zoli linz pou lo médssin an késtyon é la nonm ali. aye ! aye ! aye ! mondyé ségnèr ! Promyé gran médssin dann lo roiyome épi la donn ali in lékipe médssin pou travaye sanm li, koze latin, é fane dolo bénite é toute sak i s’ansui... Pou lo rèst zot i koné dann tan-la la médssine téi kass pa lo kate pate in kanar, donk ninporte ki té i pé fé lo médssin san z-ète oblizé guéri.

Mé zot va oir lo Roi-la téi kontante pa li dsa é la désside mèm fé soign dann in zourné toute malade lo roiyome é pou sa li l’avé lo pli gran médssin à son dispozission... Sé pou sa kan lo péizan la di li vé rotourn son mézon, é ké li la komanss di li lé pa médssin, in sak do kou la tonb dossi li é vitman-vitman li la rokonète li lé médssin… An atandan landomin matin.

Koton mayi i flote, rosh i koule, l’avé inn foi pou inn bone foi……

Trozyème boute la fini-proshinn foi zot va lire lo katriyèm morsso.