In pé partou, dann tout landroi, néna inn-dé pèrsone i pran azot pou bann rodrésèr d’tor. I fo pa fé sosi, i fo pa fé sola. Néna in sèl moral é na poin dé. Pass in lanspèk la moral sé mérite in rèss trankil konm in kondanasyon. Pou mon par, moin la touzour méfyé bann rodrésèr d’tor ! Pou kosa d’apré zot ? Pars konm i di : « Méfyé lo ki dor ». Kant ou i atann lo moins ala ké li rant an tanpète. Mi vé pa anparl laktyalité forséman mé pou sak i suiv in pé zot la du romarké bann moun lé an promyér lign pou lo réspé la moral, lo bann komannman Bondyé, néna pou désèrtin la taye sou zot soulyé é lo mond i koné pa. Parèye pou bann zintégris la politik, i ariv lo zour la loi i débisk azot. Mi vé pa dir bann pèrmisif lé pli moral ké bann moralis mé kant mèm, mi pans mon kozman lé a krézé . Donk, mi kite azot rofléshi la dsi é ni artrouv pli d’van. Sipétadyé !