Oté

Mèm bann promyé d’kordé i pé pran lo fon

Justin / 23 novanm 2018

JPEG - 43.6 ko

Zot i koné kozman kréol i ariv amoin ékri souvan défoi. Kozman-la i di konmsa : « Anval in mo sé gard in zami, é larg in mo sé pèrd in zami ». Sa lé vré pou bann ti kolon konm zot épi konm moin, mé sa lé vré pou bann moun la ote : bann promyé d’kordé konm i di.

Kosa i lé in promyé d’kordé ? Sé in moun, dann in group, anmaré lé z’inn avèk lé zot par in kord, i grinp dsi bann montagn néna in roll lo pli inportan k’sak lé zot vi k’son rol sé d’anpèsh lé zot tonm dann vid. Pou lo Prézidan, d’apré sak moin la konpri sé sak i réisi alé oir lé zot i réisi pa. Biensir kan i di réisi sa i vé dir réisi ramass larzan par pongné.

Nout prézidan néna toultan in mové kozman pou di dsi sak la pa bann promyé d’kordé. In zour li la di in travayèr si ou i vé in kostime ou na ka travaye. In n’ot zour li di dann la gar néna in kantité d’moun i ariv pa trap okin bi. Zot i souvien kan li la di : si zot la poin travaye travèrs shomin zot va gagné. Dizon kan néna in kozman i fo pa di, li di épi i fé aeien pou li si i malkontant demoun.

Na poin lontan li té i parl in moun i apèl Karlos Gohn, gran diréktèr dann l’antropriz Reno, épi galman dann bann zizine loto laba dann Zapon. Biensir li la mète in ta d’travayèr déor é sa la pa zène ali ditou. Pou bien rékonpans ali li la gingn-d’apré sak i di !-45 milyon l’éro par zour, kisoi in zour d’travaye, kisoi in zour konzé.

Nout prézidan té ki admir ali pou vréman. Sof ké sak li téi gingn lété pa asé pou li, li la donn dann la frode fiskal laba dann Zapon é d’apré sak i di i shof pou son matrékil. Konm koi bann promyé d’kordé zot osi i pé déboulé.