Méssyé Jégo la parti an Gwadloup pars la-ba, konm zot i koné, nana in grèv séryé. Grèv-la, la karsèr tout lékonomi : lésans i vann pi, bann gran sirfas lé blizé tak baro, lantropriz na pi sak i fo pou travay, étsétéra-étsétéra, la ké lo ra…

Demoun i fé konm k’i gingn, mé i gingn pa fé granshoz...
Donkalor, lé normal sokrétèr Léta pou loutrémèr i sava la-ba pou sèy trouv in manyèr pou finir avèk sa. Lé normal, vik a s’ki paré, la-ba zot la poin, konm nou isi, in préfé-gouvèrnèr.

Donk méssyé Jégo la parti an Gwadloup épi li la akiz bann pétrolyé, pars solon li, banna i fé sak i apèl inn « enrichissement sans cause ». Kaziman zot i trik demoun déssi lo pri ! Otroman di, zot bénéfis lé égzazéré é pliské !

Mi koné pa koman sa i éspas la-ba, mé isi, paré t’il, lo shèf lo pri lésans sé lo roprézantan Léta épi li désid boutèy lo gaz v’arète vin éro, i bès ar pa ! Li la déside galman lésans va bès lo minimom ! Gazoil i bès myé, vik mésyé Préfé na bon kamarad an parmi bann transportèr. Kosa sokrétèr Léta i di ? Aryin !… A ! A ! Zot sré pa, kant mèm, in pé mèm konplis dann so zafèr "lanrishisman-san-koz" ?

Justin