Si zordi i poz la késtyon pou savoir si nou lé paré pou fèr fass bann risk natirèl mi panss pa in bonpé d’moune lé riskab réponn késtyon-la par oui.Pars si nou la antann anparl bann déstrikssion, si nou la antann bonpé demoune anplègné, si astèr ni ékoute toute bann problèm ni koné zordi é dopi sépa konbien lo tan, mi kroi pa la majorité va réponn par oui.

Biensir nou téi antann dopi dé moi bonpé d’moune apré s’anplègn pou zot kaz osinonsa zot apartman.Si par tan normal demoune l’avé a anplègné té sir avèk in siklone konsékan bann féblèss demoune téi signal nora té agravé. Téi antann galman dopi dé zané é dé zané demoune l’avé install azot san vergogn dann li la ravine é bann mové léspri téi di la plass dolo la passé li va ropass in zour mèm si demoune la fé zot kaz landroi-la.

An fète sirésèrtin La Rényon lé pa paré pou fèr fass bann gro-gro siklone : son rézo éléktrik lé pa paré, son rézo d’lo lé pa paré non pli, son bann shomin ossi lé pa paré. La vi, lo van, la plui l’amontr issi La Rényon l’avé in bann fézèr d’toi lé pa doué pou sa. Nou la vi bann toi kite zot anplasman pou alé mète azot dann la kour d’moune. Nou la vi bann kaz pran la déssante dann la ravine.

Alor ? Noute toute i koné firamézir bann siklone va vni plizanpli for pars i lite pa konte lo dérègloman klimatik, na poin in plan éfikass pou lite konte sa. La Rényon sé bonpé laparanss dann bonpé domene… an fète la pwin in kode pou la konstrukssion dann in péi tropikal avèk in natir si tèlman boulvèrssé. Mèm landroi lé danzéré pou résté bann kaz lé ankor la, é bann demoune téi kontante azot avèk sa... é lo bann zotorité i bouz pa non pli.

Eskiz mon pardon ! Lo mèm koz i provok lo mèm zéfé é pa zordi pa domin sak nou la vi lé riskab roprodui an santène foi pli for.

A bon antandèr, salu !