Mé zami, zot i rapèl l’ot zour désèrtin moun la parti protèsté pou anpèsh demoun malad rant isi dsi lo sol rényoné pars zot lé riskab amenn anou la maladi k’i apèl covid. La loi la bourade azot é mi an souvien bien néna in pé téi di : si ou lé fransé, i fo ou i ankèss lo bon konm lo mové koté, lo zavantaz, konm lo zinkonvényan, pou lo méyèr é pou lo pir. Donk nou la anpèrd lo tan é pou fini lo 11 mars la maladi la débark isi.

Bann tète zèf la proféktir épi l’Ars la trouv in solisyon orizinal mé si tèlman « injénu ». La fé sign bann demoun prézimé pa bien pran lo l’angajman, alé konfine azot dann zot kaz épi rèss la katorz zour é sort apré. Banna la sign in déklarasyon dsi l’onèr épi mi pans zot la anvoye dingé-moun vilin néna, mé moun kouyon lé rar épi la maladi la instalé : troi kar lo bann ka lété inporté é lo rèstan la donn rant famiy. Si tèlman lo préfé la fini par romark son ane té inn bourik épi li la désid karsèr lo bann zarivan dann l’otèl.

Mi pans sa la kal lo kontaminasyon. Mé oila, sé pa koman bann tètzèf la rédiz zot tèks, sé pa si zot la fé in l’érèr, sansa si zot la fé éksopré mé oila lo konsèye konstitisyonèl la désid kass lo karantène dann l’bann santr prévu pou sa é oila ké nou la artourn avèk bann déklarasyon dsi l’onèr o plézir lo déklaran dsi l’onèr.

Mé konm i di, mèm koz i produi mèm zéfé, é sak l’ariv l’ot zour lé riskab ariv ankor. Dézyèm vag ? So kou isi lé posib pars bann kondisyon sar réini in n’ot kou.