Néna désèrtin moun i pans la vi sé in gran flèv trankil. Tout demoun lé bo, tout demoun lé zanty ! Zot i kroi sa zot ? Moin mi kroi pa ditou pars dann in n’afèr demoun néna intéré pou ète solidèr, momandoné bataye i pète dann park kanar. Lo dan avèk la lang, sa dé kékshoz néna intéré pou ète asosyé, mé tazantan ala ké lo dan i mord in kou la lang é la lang i jir ali pli ba k’la tèr. La vi lé konmsa : kan ou i kroi ké dé moun lé konm shoushoute avèk la mori ala ké zot lé paré pou bataye konm lo shien. Rofléshi bien la dsi é zot va oir tazantan-mèm si lé pa toultan-sa lé vré.alé ! Mi kite azot pou rofléshi la dsi é ni artrouv pli d’van. Sipétadyé !