Pou kalkilé, mésié Préfé la kalkilé ! Épi, mi pans osi, mésié Jégo la donn ali in bon koud’min. Konmsa, bann Rénioné i pé ète asiré la pa tronp dan le pri. Mé o zis, pou kosa mésié Préfé la gingn l’èd mésié Jégo é vèrsi-vèrsa ? La pa pou fé in l’opérasyon, mèm in pé difisil ! La pa pou fé in kontaz, mèm in pé konpliké !
Pou moin, lé dé konpèr la diskit ansanm, pou tash moiyin pa tro pèz déssi gozié z’ot zami, épi pou pa pran lo risk plis k’i n’an fo.
Z’ot zami ? Pour sir, bann pétrolyé an promyé, pars i fo réspèk bann rish, réspèk z’ot rishès ! Pour sir, bann transportèr, pars na poin lontan té i bat pa la min dann do inn-a-l’ot ? Donk, diminyé lo pri gazoil moin in éro : i mérite azot !
Bann moun na loto alor ? I fo tyinbo azot in pé an réspé, diminyé z’ot karbiran, in pé, mé pa tro... asé pou kontant azot, pou boush z’ot také, mé pa plis.
Tan ka bann i tiliz lo gaz an kantité épi la poin ni kamiyon, ni loto pars zot lé o flan ? Sa in bann lé pa danzéré ditou ! Finn kont, zot lavé ka pa ète pov, pa ète fèb ! Donk sé z’ot fote, é tanpi pou zot si lo gaz i bès pa ! Pa in grin, pa in katsou ! Sé dsi zot k’i tir la tar !

Justin