Astèr mwin la garde télé é so kou issi la di amwin : dsi san lite par mète karé, vin pour san i déboul la pante donk lé pèrdu. Karante i évapore. I rèss karante é sa i rante dann lo nape soutérène. Donk dsi san lite, soissante i shape é i rèss solman karante pou alimante la nape delo… Lé vré karante lite delo par mète karé la pa arien ditou sirtou si la plui i artonb domin, apré d’min é d’ote zour ankor.

Mé antanssion ! Alon pa apèl sa la séshrèss, alon apèl sa noute inprévoiyanss. Alon apèl sa lanfoutanss bann résponssab piblik. Alon mète sa dsi lo konte zot soussi kapitalist pou fé larzan é pa pou done anou saitisfakssion dsi la késtyonn d’lo… Konpran amwin bien ! Mi vé pa rovnir lo tan nou téi fé noute toilette avèk in boite guigoz de lo solman. Mi vé pa rovnir lo tan nou téi sar bate linz la rivyèr, ni kui manzé avèk dë doi fané d’lo dann marmite.

Mi di sinpleman, ziska zordi nou néna la shanss an avoir dolo ébin si solman nou téi ramass in pé é noute toute i pé fé sa… sof bann pouvoir piblik pars pou zot i paré lo la plui lé danzéré mèm si sé pou la shass delo. Eskiz mon pardon m’a di azot mi konpran pa é mèm si l’avé in pti danzé i gingn pa konbate danzé-la ? Lé vré néna déssèrtin moi la plui i tonb pa : ok ! Mé akoz i fé pa bann lak artifissyèl. I fé sa Maurice, i fé sa dann d’ote zandroi. A ! Mwin la konpri konm lo noute losséan indien lé pa bon pou abate la shalèr, noute lo la plui galman néna son péshé orizinèl.

Alé dormi don ! Rakonte sa d’ote ! Fransh vérité i manke in vré politik delo é si i konfyé sa bann rényoné, sirésèrtin sar in sukssé, san tardé, konm pou pèss toute zafèr i pé fèr issi é ni pé fèr issi... In plan par bann rényoné pou bann rényoné.

A bon antandèr salu !

Justin