In n’afèr ou la vi étan pti, sa i rèss dann out tèt... Zistoman, mi rapèl in karikatir : nana in boug té i vann do vin. Déyèr kontoir, nana in sèl damzane épi an-o in bann robiné pou tir d’vin, avèk plizyèr kalité ; "vinn par issi", "côte intèl", "vin nèv"... étsétéra, la ké lo ra. Donkalor, dann in mèm barik, téi tir plizyèr kalité do vin.

Sa i fé pans amoin lésans i vann La Rénion : nana tout mark, solman tout lé parèy : mèm san-plon, mèm gazoil, mèm pétrol, mèm gaz. Tousala i sort mèm landroi, l’ariv dann mèm bato épi lé parèy.
Alors oussa i lé la "konkirans lib-é-non faussée", oussa i lé bann zinvèstisman bann sosyété pétrolyèr, oussa i lé laméliorasyon la kalité ?
Pou mon par, mi oi pa ! Solman, i kan nana in kontraryété, astèr-la kréol i san passé... Bann pouvoir piblik i bouz pa non pli. I diré, mé pétèt mi fé in lérèr... moin na konm linpréssion, in léspès dalonaz... Moin la zamé antann dir, zot lété pa dakor é dsi kossa ! Tout fasson, sé dsi nout dos ki rash la plime boudikont !

Alors, san rode kass-lé kui tout-fors, mi trouv so késtionn lésans, i arsanm in pé karikatir, nou la vi an-o la : mèm shoz, pri for, mé pa mèm létikète... Banna i ème farsé, oté !

Justin